კლარა ბარათაშვილი (1950 – 2012 წწ.) – ჟურნალისტი. მამამისი, ლატიფშაჰ ბარათაშვილი, იყო მესხების ლიდერი სამშობლოში დაბრუნებისათვის და მესხების ეროვნული თვითშეგნების აღდგენისათვის ბრძოლაში .
კლარა დაიბადა დეპორტაციაში, უზბეკეთში. სკოლა აზერბაიჯანში დაამთავრა, უმაღლესი განათლება ლენინგრადში მიიღო. 1989 წ. დაბრუნდა საქართველოში.
აი, რას წერდა ის საკუთარ თავზე: “ჩემი ძირითადი შემოქმედება ჩემი ცხოვრებაა, განვიცადე დევნა, ვშიმშილობდი, მციოდა, ვავადმყოფობდი და მიჭირდა. კარგად ვიცი პროგრესის ფასი. დიდია განსხვავება სამშობლოდან შორს და მშობლიურ მიწაზე ყოფნას შორის. უცხო მხარეში შენთვის მხოლოდ აწმყო არსებობს, შინ კი წარსულიც გაქვს და მომავალიც, გრძნობ კავშირს მშობლიურ მიწასთან, პოულობ შენს ფესვებს და ამაოდ არ ირჯები სხვა სამყაროების ძებნაში, შეიცნობ საკუთარ თავს და იმკვიდრებ შენს ადგილს სამყაროში.”
წარმოგიდგენთ კლარა ბარათაშვილის სამ მოთხრობას. ისინი დაიწერა უკვე სამშობლოში, საქართველოში. ისინი ეხებიან შემოქმედების სიხარულს, სამშობლოს პოვნას, ცხოვრებას.