ეს წიგნი იმით არის განსაკუთრებული, რომ უნდა წაიკითხოთ აუჩქარებლად და რამდენჯერმე. ასევე, საიტზე სხვა ტექსტებთან განსხვავებით, ეს ნაშრომი დაწერილია არა თანამედროვე საქართველოში, არა სსრკ-ში და არა რუსეთის იმპერიაში. ეს ნაშრომი დაწერილია ევროპაში.
ავტორი, გამოჩენილი ქართველი მეცნიერი და საზოგადო მოღვაწე ვიქტორ ნოზაძე (1893-1975), თავისი ცხოვრების დიდი ნაწილი საზღვარგარეთ ცხოვრობდა. 1919 წლის ბოლოს საქართველოს დემოკრატიული რესპუბლიკის მთავრობამ ნოზაძე 70 ახალგაზრდასთან ერთად უცხოეთში გააგზავნა სწავლის გასაგრძელებლად. ის სამშობლოში აღარ დაბრუნებულა იმიტომ, რომ ვერ მიიღო კომუნისტური დიქტატურა.
ნოზაძე ემიგრაციაში აქტიური საზოგადო და მეცნიერული მოღვაწეობით იყო დაკავებული. საბჭოთა მთავრობა მას “ხალხის მტერს” ეძახდა, ხოლო ნოზაძის ნებისმიერი ხსენება ან ციტირება სსრკ-ში იყო აკრძალული. მაგრამ მან დაგვიტოვა მსუყე მეცნიერული მემკვიდრეობა, რომელიც საქართველოსაც და კავკასიასაც ეძღვნებოდა.
ნოზაძის კვლევა “საქართველოს აღდგენისათვის ბრძოლა მესხეთის გამო” ქართულ ენაზე პირველად ჟურნალ “ქართლოსის” მაისის ნომერში (პარიზი, 1939 წ.) გამოქვეყნდა, საქართველოში კი მხოლოდ 1989 წელს გურამ მამულიას რედაქციით.